Sterkasti leikurinn

Guðspjallið lesið og síðan hundrað orða hugleiðingin

Lögvitringur nokkur sté fram, vildi freista Jesú og mælti: „Meistari, hvað á ég að gera til þess að öðlast eilíft líf?“
Jesús sagði við hann: „Hvað er ritað í lögmálinu? Hvernig lest þú?“
Hann svaraði: „Elska skalt þú Drottin, Guð þinn, af öllu hjarta þínu, allri sálu þinni, öllum mætti þínum og öllum huga þínum og náunga þinn eins og sjálfan þig.“
Jesús sagði við hann: „Þú svaraðir rétt. Ger þú þetta og þú munt lifa.“
En lögvitringurinn vildi réttlæta sjálfan sig og sagði við Jesú: „Hver er þá náungi minn?“
Því svaraði Jesús svo: „Maður nokkur fór frá Jerúsalem ofan til Jeríkó og féll í hendur ræningjum. Þeir flettu hann klæðum og börðu hann, hurfu brott síðan og létu hann eftir dauðvona. Svo vildi til að prestur nokkur fór ofan sama veg og sá manninn en sveigði fram hjá. Eins kom og Levíti þar að, sá hann og sveigði fram hjá. En Samverji nokkur, er var á ferð, kom að honum og er hann sá hann kenndi hann í brjósti um hann, gekk til hans, batt um sár hans og hellti í þau viðsmjöri og víni. Og hann setti hann á sinn eigin eyk, flutti hann til gistihúss og lét sér annt um hann. Daginn eftir tók hann upp tvo denara, fékk gestgjafanum og mælti: Lát þér annt um hann og það sem þú kostar meira til skal ég borga þér þegar ég kem aftur.
Hver þessara þriggja sýnist þér hafa reynst náungi þeim manni sem féll í hendur ræningjum?“
Hann mælti: „Sá sem miskunnarverkið gerði á honum.“
Jesús sagði þá við hann: „Far þú og ger hið sama.“

Lúkasarguðspjall 10. 25-37

Hann hljóp að manninum sem hafði verið sleginn niður og spurði hvort kalla ætti til sjúkrabíl. Maðurinn umlaði eitthvað óskýrt og honum skildist að það væri nei. Tók svo ákveðið undir handlegg hans, reisti hann varlega upp og hvæsti svo grimmilega á sökudólginn sem stóð álengdar og fylgdist óttasleginn með. Fórnarlambið bað hann að vera rólegan og stundi af sársauka. Hélt um kjálkann og sagði svo lágum rómum að best væri að fara og faðma mannhundinn. Það væri sterkasti leikurinn í þessari stöðu. Væri miskunnarverk. Ekki vegna þess sem hann hefði gert heldur gæti kærleiksríkt faðmlagið brætt kalt hjarta hans.