Þurfum annað svar

Guðspjallið lesið og síðan hundrað orða hugleiðingin

Þegar þeir nálguðust Jerúsalem og komu til Betfage við Olíufjallið sendi Jesús tvo lærisveina og sagði við þá: „Farið í þorpið hér fram undan ykkur og jafnskjótt munuð þið finna ösnu bundna og fola hjá henni. Leysið þau og færið mér.  Ef einhver hefur orð um, þá svarið: Drottinn[ þarf þeirra við, og mun hann jafnskjótt senda þau.“
Þetta varð svo að rættist það sem spámaðurinn sagði fyrir um:
Segið dótturinni Síon:
Konungur þinn kemur til þín,
hógvær er hann og ríður asna,
fola undan áburðargrip.
Lærisveinarnir fóru og gerðu sem Jesús hafði boðið þeim,  komu með ösnuna og folann og lögðu á þau klæði sín en Jesús steig á bak. Fjöldamargir breiddu klæði sín á veginn en aðrir hjuggu greinar af trjánum og lögðu á veginn. Og múgur sá sem á undan fór og eftir fylgdi hrópaði:
„Hósanna syni Davíðs! Blessaður sé sá sem kemur í nafni Drottins! Hósanna í hæstum hæðum!“
Þegar Jesús kom inn í Jerúsalem varð öll borgin í uppnámi og menn spurðu: „Hver er hann?“
Fólkið svaraði: „Það er spámaðurinn Jesús frá Nasaret í Galíleu.“

Matteusarguðspjall 21.1-11

Hann renndi ástúðlegum augum yfir söfnuðinn. Sagði síðan með leikrænum tilþrifum svo hver leit í skyndi á annan: „Hver er hann?“ Hann steig úr stólnum, eilítið fölur á svip og þögult fólkið horfði á hann. Meðhjálparinn sagði að þetta hefði verið áhrifaríkt móment: „Hver er hann?“ Hann settist við borðið og fékk sér gúlsopa úr vatnsflöskunni og sagði hugsi: „Það er ekki nóg að við svörum því að hann sé spámaðurinn Jesús frá Nasaret í Galíleu. Hvað segir það okkur sem elskum hlaðborðin, líkamsræktina og Teslurnar? Við þurfum annað svar, nútímalegra, og ég vona að það finnist núna á aðventunni.“