Stemma við kærleikann

Guðspjallið lesið og síðan hundrað orða hugleiðingin

Eftir þetta fór Jesús um, borg úr borg og þorp úr þorpi, prédikaði og flutti fagnaðarerindið um Guðs ríki. Með honum voru þeir tólf og konur nokkrar er læknaðar höfðu verið af illum öndum og sjúkdómum. Það voru þær María, kölluð Magdalena, er sjö illir andar höfðu farið úr, Jóhanna, kona Kúsa, ráðsmanns Heródesar, Súsanna og margar aðrar. Þær hjálpuðu þeim með fjármunum sínum.

Lúkasarguðspjall 8.1-3

Meistarinn frá Nasaret var óþreytandi. Aldrei sumarfrí. Kjarasamningur okkar við hann er hagstæður – hann færir okkur allt. Konurnar sem fylgdu meistaranum frá Nasaret lögðu fram fjármuni sem studdu við boðun fagnaðarerindisins. Allir geta lagt fram sitt og eru verðmætir í augum meistarans og hann sýnir okkur það við misjafnar undirtektir. Allir eru dýrmætir eins og þeir eru. Fagnaðarerindið er kærleikur til annarra – svo boðar kirkjan alla daga en ekki sjálfsvorkunn, yfirlæti né snobb. Safnaðarfólk leggur fram sitt sóknargjald og þjóðkirkjan á mikla fjármuni og ekki má bruðla með þá eins og enginn sé morgundagurinn. Allt verður að stemma við kærleikann.