Skjöldur hans og meistarans

Guðspjallið lesið og síðan hundrað orða hugleiðingin

Þá leiddi andinn Jesú út í óbyggðina til þess að djöfullinn gæti freistað hans. Þar fastaði Jesús fjörutíu daga og fjörutíu nætur og var þá orðinn hungraður.  Þá kom djöfullinn og sagði við hann:
„Ef þú ert sonur Guðs þá bjóð þú að steinar þessir verði að brauðum.“
Jesús svaraði:
„Ritað er: Eigi lifir maðurinn á einu saman brauði heldur á hverju því orði sem fram gengur af Guðs munni.“
Þá tekur djöfullinn Jesú með sér í borgina helgu, setur hann á brún musterisins og segir við hann:
„Ef þú ert sonur Guðs þá kasta þér ofan því að ritað er:
Hann mun fela þig englum sínum
og þeir munu bera þig á höndum sér
að þú steytir ekki fót þinn við steini.“
Jesús svaraði honum:
„Aftur er ritað: Þú skalt ekki freista Drottins, Guðs þíns.“
Enn tekur djöfullinn hann með sér upp á ofurhátt fjall, sýnir honum öll ríki heims og dýrð þeirra og segir:
„Allt þetta mun ég gefa þér ef þú fellur fram og tilbiður mig.“
En Jesús sagði við hann:
„Vík brott, Satan! Ritað er: Drottin, Guð þinn, skalt þú tilbiðja og þjóna honum einum.“

Þá fór djöfullinn frá Jesú. Og englar komu og þjónuðu honum.

Matteusarguðspjll 4.1-11

Blaðamaðurinn sagðist viss um að meistarinn frá Nasaret væri heimildamaðurinn um þetta samtal við djöfulinn í eyðimörkinni. Frásögnin af þessum samskiptum væri mergjuð forsíðufrétt. Djöfullinn alltaf samur við sig, ísmeygilegur og freistandi. Allt væri í boði. Steinar yrðu að brauði með guðlegum hætti og auðvæfi heimsins á silfurfati. Lystisnekkjur og einkaþotur, vín og víf. Þetta sem margir vilja eignast og tilbiðja. Í augum meistarans frá Nasaret var þetta allt hjóm. Enda hrökklaðist djöfsi niðurlútur undan honum. Englaþyrping umvafði hann. Blaðamaðurinn sagðist hafa fundið návist engils þegar hann stóðst stundum freistingar heimsins. Kjörorðið: „Vík brott, Satan!“ var skjöldur hans og meistarans.