Skært ljós eilífðarinnar

Guðspjallið lesið og síðan hundrað orða hugleiðingin

Þér eruð salt jarðar. Ef saltið dofnar, með hverju á að selta það? Það er þá til einskis nýtt, menn fleygja því og troða undir fótum.
Þér eruð ljós heimsins. Borg, sem á fjalli stendur, fær ekki dulist. Ekki kveikja menn heldur ljós og setja undir mæliker heldur á ljósastiku og þá lýsir það öllum í húsinu. Þannig lýsi ljós yðar meðal mannanna að þeir sjái góð verk yðar og vegsami föður yðar sem er á himnum.

Matteusarguðspjall 5. 13-16

Þetta er dagurinn þegar látinna er minnst. Minningar streyma sem ljós til okkar og við þökkum fyrir þær. Vegferð okkar í heiminum er lýst heilráðum þeirra sem fóru á undan okkur. Þau veita öryggi í lævísu myrkri heimsins sem fyllir okkur ótta og þau gleðja hugann með kærleika sínum. Trú okkar segir að ljós heimsins, meistarinn frá Nasaret, umfaðmi þau framliðnu. Þess vegna reynum við í trausti til meistarans að bera ljós til annarra og vísa veg en mestu máli skiptir að við göngum í ljósi hans. Hann er upprisinn og boðar okkur skært ljós eilífðarinnar. Það er fagnaðarerindi trúarinnar.