Mér hrýs skyndilega hugur

Guðspjallið lesið og síðan hundrað orða hugleiðingin

Varist falsspámenn. Þeir koma til yðar í sauðaklæðum en innra eru þeir gráðugir vargar. Af ávöxtum þeirra skuluð þér þekkja þá. Hvort lesa menn vínber af þyrnum eða fíkjur af þistlum? Þannig ber sérhvert gott tré góða ávöxtu en slæmt tré vonda. Gott tré getur ekki borið vonda ávöxtu, ekki heldur slæmt tré góða ávöxtu. Hvert það tré, sem ber ekki góðan ávöxt, verður upp höggvið og því í eld kastað. Af ávöxtum þeirra skuluð þér því þekkja þá.
Ekki mun hver sá sem segir við mig: Drottinn, Drottinn, ganga inn í himnaríki heldur sá einn er gerir vilja föður míns sem er á himnum.
Margir munu segja við mig á þeim degi: Drottinn, Drottinn, höfum vér ekki í þínu nafni flutt orð Guðs, rekið út illa anda og gert mörg kraftaverk? Þá mun ég votta þetta: Aldrei þekkti ég yður. Farið frá mér, illgjörðamenn.

Matteusarguðspjall 7.15-23

Það eru hin sem eru falsspámenn. Ég þekki sauðaklæðin og sé holdmikla gráðuga hönd þeirra. Speki þeirra er útþynnt og ráðin gagnslaus. Ég þekki þau af ávöxtum þeirra. Heyri þau smjaðra og sé þau snúast með lævísri stimamýkt kringum þau sem telja sig hafa vald. Gefa ekkert fyrir meistarann þegar á hólminn er komið. Telja upp ímynduð afrek sín í verkaréttlætingu til þess að komast á spena og í mjúkt sæti. Ég þekki þau. Mér hrýs skyndilega hugur þegar ég sé mig í hópnum þylja varajátningar. Mig með grámyglaða ávexti og verð hverft við. Þá hrópa ég: Meistari, miskunna mér!