…kominn til að leita hins týnda

Guðspjallið lesið og síðan hundrað orða hugleiðingin

Jesús kom til Jeríkó og gekk gegnum borgina. En þar var maður er Sakkeus hét. Hann var yfirtollheimtumaður og auðugur. Langaði hann að sjá hver Jesús væri en tókst það ekki fyrir mannfjöldanum því að hann var lítill vexti. Hann hljóp þá á undan og klifraði upp í mórberjatré til að sjá Jesú, en leið hans lá þar hjá. Og er Jesús kom þar að leit hann upp og sagði við hann: „Sakkeus, flýt þér ofan, í dag ber mér að vera í húsi þínu.“
Hann flýtti sér ofan og tók á móti honum glaður. Þeir er sáu þetta létu allir illa við og sögðu: „Hann þiggur boð hjá bersyndugum manni.“
En Sakkeus sneri sér til Drottins og sagði við hann: „Drottinn, helming eigna minna gef ég fátækum og hafi ég haft nokkuð af nokkrum gef ég honum ferfalt aftur.“
Jesús sagði þá við hann: „Í dag hefur hjálpræði hlotnast húsi þessu enda ert þú líka niðji Abrahams. Því að Mannssonurinn er kominn að leita að hinu týnda og frelsa það.“

Lúkasarguðspjall 19.1-10

Það er gamla sagan. Fitja upp á nefið finnist því fólk ekki nógu fínt: Ekki í réttu merkjafötunum. Skólaganga skrykkjótt og árangurslaus. Fast í láglaunastarfi og þrífur gólf hjúkrunarheimilanna. Sum verið á bekk með utangarðsfólki, heimilislaus og illa til reika. Jafnvel hagnast óheyrilega á vafasömum viðskiptum. Iðrast. En þau sem fyrirlíta aðra verða alltaf til. Sitja í öruggu dómarasæti að þeim finnst. Og munu ekki þiggja boð hjá pakkinu, hinum bersyndugu. Nema meistarinn frá Nasaret. Hann kallar á þennan fyrirlitna auðmann, Sakkeus, og segist eiga að vera í húsi hans. Núna. Enda kominn til að leita hins týnda. Frelsa hugann.